Assalamu’alaikum Warahmatullahi Wabarakatuh 

Yang sayo hormati :

Kepado sepucuk jalo sepancung manau, nan makan ngabis nan mancung mutus, yaitu bapak kepala desa .... beserto jg dg para perangkat desa dan stafnyo.

dan tak lupo pulo kepado paro depati nenek mamak, alim ulama cerdik pandai tuo tau tuo tengganai suluh sinang dalam negeri, baik dari pihak suku nan menunggu maupun pihak suku nan datang.

dan tak lupo pulo kepada hadirin walhadirat para undangan baik dari pihak laki-laki maupun pihak perempuan, baik yg datang dari jauh maupun datang yg dari dekat, kecik banamo gedang bagelar kecik sakti gedang batuah, kecik dk kami sebut namo gedang idak pulo kami imbau gelarnyo.

Baiklah datuk nenek mamak suku nan sebelah kampung nan sebagi. Pertama sekali, marilah kito tidak henti -hentinyo memanjatkan puji dan syukur kehadiran Allah subhanahu wa ta 'ala Tuhan Yang Maha Esa, yang mano pada pagi menjelang siang iko kita dapat hadir dan berkumpul di rumah nan sebuah iko dalam rangka serah terimo anak buah anak penakan kito.

Salawat dan salam tak lupo pulo kito hadiahkan kepada junjungan kito Nabi Besar Muhammad SAW.

"Allahumma shalli ala syaidina muhammad, Waala ali syaidina muhammad"

Nenek mamak suku nan sebelah kampung nan sebagi nan sayo muliokan, sebelumnya nenek mamak, yo kami mohon maaf sekironyo kedatangan kami nan serombongan iko ado menyalahi adat pusako nenek mamak nan disiko.

Maklumlah nenek mamak bak kato patah orang tuo dulu lain lubuk lain ikan lain padang lain pulo belalangnyo, lain tempat lain pulo ico pakainyo.

Nenek mamak suku dan sebelah kampung dan sebagi nan saya muliokan, sayo ko wakil dari pado suku dan datang, sayo ko bak kato patah orang tua dulu nenek mamak ibarat kudo pelajang bukit, biduk sampan pelayangan, diimbau datang disuruh pergi, tentunyo sayo ko mewakili dari pado Bapak ........ dan Ibu ........ sekeluarga besar dari pado asalnyo Desa ........, Kecamatan ......., Kabupaten ....... , ........

Yo kami ko nak mengantar anak buah anak kemenakan kami ko yang bernamo .........

Yang mano anak buah anak penakan kami ko nenek mamak kok mudik nyo lah teguntung, kok ilir nyo lah tamuaro, lah letih kaki dek berjalan lah tipis tepian perahu, lah genting pulo gendan pengayuh, dek nak mencari sanak nan mau bakato kasih nan sudi pulo babagi sayang.

Kini ko nampaknyo nenek mamak disikolah kasih nan belebih sayang nan tatumpah.

Bak kato pepatah orang tua dulu nenek mamak kasih teluk kapal tasangkut, kasih batang cenawan tumbuh, yo kasih anak penakan kami jugo lah nampak kami ke rumah nenek mamak iko yo nenek mamak anak penakan yang kami antar ko yo kok umur belum setahun jagung yo kok darah belum setapuk pinang, kok akal belum pulo selilit telunjuk, anak buah yang kami antar ko tidak pulo kami serto emas nan kuning, perak nan putih, uang nan babilang, yo serah kami ko serah hino diri, tapi yo nenek mamak serah kami ko tidak pulo lah serah icak -icak bak ayam diambo tadi dipijak, serah kami ko serah iyo iyo niyan nenek mamak.

Di hari nan baik ketiko nan elok iko, dari hati nan suci muko nan jernih pada hari iko, yo kami nak nyerahkan anak buah anak pelakan kami ko nenek mamak, yo nenek mamak serah kami ko iyo serah patah umbut, idak pulo serah patah arang, masih ado tali suto nan maikat di antaro duo keluarga kito.

Kok besok luso timbul kusutnyo yo samo -samo pulo kito mentangnyo, yo kok timbul keruhnyo samo -samo pulo kita nyernihkannyo, apo lagi hari nan baik ketiko nan ilok iko, kami serahkan anak penakan kami ko dengan badan yang sehat, akal nan kuat, disertai pulo tulang delapan kerat, yo kok besok luso timbul sakit peningnya yo ubatlah nenek mamak, yo kok besok luso timbul sampo gila mambangnya yo pasung go lah di nenek mamak.

Nenek mamak suku dan sebelah kampung dan sebagi nan saya hormati.

kok dk ado lagi ranting nan mautik mato, kok punggur nan manimpo kuduk, anak penakan kami ni ko nak kami serahkan, namun sebelum dari pada itu nenek mamak, yo nak diberi pulo nasihat kepada anak buah nak penakan kami ko.

Oh anak panakan kami ...(nama pengantin pria)...

Hati-hati membawo diri kalau badan nak elok selamat, baik laku kalau nak disayang mertuo, apalagi mertuo kebunnyo banyak, ternaknyo banyak, kalau kita rajin pandai mangambil hati orang tuo InsyaAllah aman kito isoknyo, dan yang terakhir yang pesan kami dimanapun kito berado, apapun keadaan kito, baik ketiko sendiri maupun beramai-ramai jangan lupo dan jangan tinggalkan solat 5 waktu, kareno itu jugo merupakan kunci rumah tangga yang sakinah, mawaddah, warahmat. Amin.

Itulah nenek mamak dapat kami sampaikan, bak kato pantun orang tua dulu nenek mamak

"Cukit pedamar Pelito ketayo, pecukit ada di ujung tangan, yo nang kami antar pun minta diterimo, barulah kito berjabat tangan"

Nak duo pantun seiring :

"Kalau ada pengayuh bilah, Jangan letak dekat kemudi, Kalau ado kato kami yang salah, Yo ampun dan maaf sepenuh hati"

Amin....

Salah kepada Allah, kami minta taubat, Salah kepada Nabi, kami minta sepaan.

Yo salah kepada kito nan banyak iko yo kami minta dimaafkan.

Kami akhiri,

Billahi taubillah hidayah

Wassalamualaikum warahmatullahi wabarakatuh.