Berita Desa

4. KATO BAJAWAB DIHALAMAN

BAGIAN IV

KATO BAJAWAB DI HALAMAN
(di halaman rumah penganten perempuan)

 


PIHAK NANG DATANG (1)

Assalamualaikum Wr.Wb.
Manolah segalo kito nang banyak, Datuk- datuk , nenek mamak, tuo tuo tengganai, alim ulama cerdik pandai, nang kecik idak kami sebut namonyo, nang gedang idak pulak kami imbau gelarnyo ibu-ibu serto hadirin yang kami muliokan. Segalo kito nang ado di halaman rumah nang sebuah ko, iolah rumah nang bapagar adat, halaman nang basapu undang, tepian nang bapagar baso.


Adopun kedatangan kamiko, nang lengkap arak beserto iringnyo, iolah hendak mengantarkan anak buah anak kemenakan kami nang banamo ........bin........ untuk balik ka rumah nang sakato tanganai , iolah rumah bapak :................. baduo laki bini sekeluarga besaknyo, atau rumah anak nang barajo ka bapak, rumah kemenakan nang barajo ka meman.
Rasonyo idak salah lagi, yo lah iko rumahnyo. Sebab kami ko datang nang bajemput, tibo nang diimbau.

 

PIHAK NANG NUNGGU (1)

Assalamualaikum Wr.Wb.
Datuk- datuk,nenek mamak, tuo tuo tengganai, alim ulama cerdik pandai, nang kecik idak kami sebut namonyo, nang gedang idak pulak kami imbau gelarnyo, wabilhusus nang baru tibo, nang lengkap arak beserto iringnyo nang kami mulyokan. Terlebih dahulu kami ucapkan selamat datang di rumah kami ko.

Induk ruso terjun baduo,
Terjun duo beranak.
Ampun doso kepada nang tuo,
Mohon ma'af kepado nang banyak

Adopun kedatangan datuk-datuk ko, sebenarnyo lah tepat di alamatnyo kalu datuk tu nembak, kok belayar datuk tu lah sampai ke pulau, kok tajalan lah sampai pulak ke batasnyo, yo nianlah ikolah rumah bapak. ........... Baduo laki bini beserto keluarga besaknyo, iolah rumah anak nang barajo ka bapak, rumah kemenakan nang barajo ke meman.

Tadi datuk mengatokan bahwa datuk datang nang bajemput, tibo nang di imbau. Kiniko kami silahkan Datuk mengikuti nang bajemput tadi untuk masuk ke rumah kami. Sebab dak elok kito bacakap di laman, barunding di sepanjang jalan.
Bak kato pantun adat:

Cempedak tumbuh dilaman
Uratnyo basusun tindih.
Jangan lamo kito tegak di laman,
Silahkan ke rumah kito makan sirih.

 

PIHAK NANG DATANG (2)

Terimo kasih Datuk :
Cempedak tumbuh di laman
Uratnyo bajelo-jelo.
Makonyo kami lamo tegak di laman,
Kareno asyik nengok ayam balago.

Tapi datuk-datuk
Tapi datuk-datuk nang kami mulyokan, kinitu nampaknyo kito bakampung lah lebar, kok basanak kito lah banyak, sehinggo lah penuh laman nang ujo, lah sesak jalan nang panjang, nang patah lah batongkat, nang butopun lah batintin.

Dik kito baorang banyak ko, tentu banyak pulak salah perangainyo, mungkin ado nang liar mato salah tengok, cepat mulut salah kato, cepat kaki salah langkah, ringan tangan salah lembai. Oleh sebab itu baik jugo kami tanyokan apo nian larangan dengan pantangan rumah nang sabuah ko pado hari nang sahariko, malam nang samalam kagik.


PIHAK NANG NUNGGU (2)

Ruponyo datuk-datuk ko takut kalu ado punggur kamanimpo kuduk, takut diranting nang kamanyucuk mato. Pado hari nang sahariko, malam nang samalam kagik. Di rumah nang sabuah ko dak ado larang pantangnyo buat datuk-datuk, Cuma ado sekedar ecoh pakai kami disiko. Kalu batemu nang barebo jangan dibongkar, bajumpo nang basawar jangan ditempuh. Kalu nang barebo datuk bongkar, nang basawar datuk tempuh jugo, salah menurut adat tentu tautang, salah menurut pisko badan binaso Cuma itulah tuk sekedar ecoh pakai kami disiko.


PIHAK NANG DATANG (3)

Terimo kasih datuk.
Kalu tu nang datuk katokan kepado kami,lah tentu dik kami, punggur nang akan manimpo kuduk, ranting nang akan menyucuk mato, lah pedoman kami untuk masuk ke rumah datuk ko.

Assalamu'alaikum...........


(keduo orang tuo penganten batin menjemput penganten jantan, dengan selendang melingkarinya untuk dibawak ke dalam rumah).

Beri Komentar

CAPTCHA Image